عزرائيل گئتدي بير چوبانين جانين آلسين گوردي
چوبان چورك يئير. چوبان دئدي گئل بورا بير ايكي تيكه چورك
يئع. عزرائيل بير ايكي لقمه اونون چوركينن
يئدي. سورا ايسته دي جانين آلسين گوردي ائليم مير
دئدي من سنون دوز چوركيوي يئميشسم ائليمرم .
پروردگار عالم امر ائيله دي من اونا اوتوز ايلده عمر وئرديم.
هر كس بيرينين چوركينن يئسه گرك هرمتين ساخليا.
bölümlər: nağılar
آتاائويميز ، بو بؤيوك شهرين دار دربند لرينين بيرينده ، بير قديمي و بؤيوك ائويدي.بير اوچ مرتبه ائو كي بؤيوك حيه طي و بؤيوك زئرزه ميسي واريدي. آنام زئرزه ميني ميطباغ ائله ميشدي. بو ميطباغين اورتاسيندا بير دؤرد بوجاقلي حوض واريدي. حوضون دامي آينا و رنگ به رنگ شوشه لرينن ايشله نميشدي. دووارلار كه رپيج دن ايدي . دووارلارين دؤوره سيني ده آق گچ ايله برجسته ايشله ميشديلر. چوخ صفالي بير ائويدي. خالانين ائوي ايكي اتاقلي بير اوئيدي. بيزيم ائويميزله دووار بيريدي. دئييرديلر كي گويا بيزيم ائو بير خانين ائويميش خالاگيلين ائوي ده اونون ميطباقچي سي و باغبانينين ائوي ايدي. آيدا ايكي دؤنه آنام ايلا خالام چيركلي يورقان دوشك اوزلرين ، پارپالتارلاري حوضون قيراغينا قويوب گور گور موتورو نفت ايله دولدوروب يئكه قازاني سوينان دولدوروب اونون اوستونه قويارديلار، ترلاني گؤزه رديلر. پيله ته نين اوستونده ده بير يئكه قابلاما آبگوشت آسارديلاكي همي آساند پيشه ردي و همي ده آز واخت آپاراردي.آنام پيله ته نين خوردون آلاردي كي آبگوشت اؤز خونيينه پيشسين و دادي چيخسين. هله ده كي هله دي آنام او پيله ته سين قيراغا قويمويوب . نييه كي دئيير زودپز ايله اجاق گاز پيشميشين اصلي دادين آرادان آپارار بركتي گئدر و قاريني دويورماز. بو آرادا من ايله آباجي ( مدرسه باغلانان زامان ) آبگوشته گؤز قولاق اولارديق كي يانماسين. ات ايله نخود دا پيشه ندن سونرا ، يئرآلمالاري سويوب ايچينه تؤكه رديك.چاي دم ائله ريديك و اونلارين يورغونلوغو چيخماغا گؤره ده پنير ، چاي چؤرك ايله اونلارا قوللوق ائله رديك. هردن ده بير تازا يئمه لي گؤي بازارا گله ردي و يئمه لي گؤي ده آريداريدق.ترلان سووزولاري الي ايله آريديب ، يوماميشدان يئيه ردي. بير گون آباجي دئدي : « ترلان خانيم يوماميش يئمه . ايچينده ميكروب وار ناخوشلاريسان.»
ترلان دئدي :« بس نييه من بو ميكروب لاري گؤرمورم؟»
آباجي دئدي :« گؤزه گؤرسه نمه زلر.»
ترلان دئدي :« او جاناوارلار كي جرات لري يوخدو گؤزه گؤرسه نه لرنئجه منيم ديشلريمين آلتيندان قورتولابيليب مني ناخوشلادا بيله رلر؟»
آنام ترلانين بو بيلگي سيز سؤزلرينين آراسينا گيريب ، دئدي :« قارنيمين چؤره ييندن ، اينيمين پالتاريندان كه سيب اوشاقلاري مدرسييه گؤنده ريره م بير شئي لر اؤرگه نه لر. بو هده رن - په ده رن سؤزلرينله زحمتيمي هئچه وئرمه.»
اودا قاه قا قاه گولوب سؤزونو كسدي.
ترلان بير جاوان آرواديدي. بئش دانا نارين اوشاقي واريدي. آيدا ايكي دؤنه بيزيم ائوه گليب ، آنام و خالاميلا پالتارلاري يوواردي. هئچ ساوادي يوخيدي گتدي ايدي. مهربان و خوش صحبت ايدي. بيزه شيرين - شيرين ناغيللار مثل لر دئيه ردي. اؤزوده خرافاتي ايدي. بيرگون جن لردن دانيشيردي كي نه ساياق كنده يوگورموشدولر. اؤز صبحتلرينده ده ناغيل ائله ميشدي كي جن لر حامامي چوخ سؤيوب و گئجه لر حامام دا ياتارلار. ياديما گلير كي نئچه واختا قدير حتي گونوز گون اورتاچاغي دا ، تك باشيما زئرزه مييه گئده بيلمه ديم.
ترلانين ساغ گؤزو كور ايدي. دئيه سن به بير قيرميزي قان تيكه سي گؤزونون قاراسينين اوستون توتموشدو.بير گون آنام سوروشدو :« ترلان باجي ساغ گؤزوون باشينا نه بلا گليب ؟»
ترلان بئله ناغيل ائيله دي:« اريميمن آغير و ووروجو الي واردي. بيزيم كندده آروادين اريندن كوتك يئمه سي مان بير ايش دئييل ( نه كي شهرده مان ايش دي ؟!) نئچه ايل بوندان قاباق كي هله كند ده ياشييرديق گونلرين بير گونونده اريم مني چوخ بئتردن دؤيدو. منيم ده جانيم آجيشدي اونا يامان يووز دئديم. اودا بير ته پيك ووردو . ته پيكي دوز گؤزومه ده يدي.»
من سؤزونو آغزيندا قويوب دئديم:« به يم آتيدي؟»
آباجيم دئدي :« يوخ ائشششه ك ايدي.»
آنام هيرص له نيب دئدي :« به يم سيزه دئمه ميشم بؤيوكلرين سؤزلرينين آراسينا آتيلمايين؟»
من ايله آباجيم تئزجه نه سه سيميزي كه سديك. ترلان سؤزونون داليسيني توتوب دئدي :« ته پيك ائلهآغيريدي كي آغريدان هوشوم باشيمدان چيخدي. اوزامان اؤزومه گلديم كي يورغان دوشه كده يم. قوهوم قونشودا دؤره مي اليب دعا اوخويوب اللاها شكر ائليرلر كي منه هئچ بير شئي اولمويوب.آما گؤزومو باغلاميشديلار. گويا سپاهي باغلاييب ، تاپشيرميشدي كي شهرده مريض خانايا اپارالار. اما آپارماديلار. كور اولموشدوم داي اؤلمه ميشديم كي.»
خالام سوروشدو :« به بير گؤزون كور اولدو آتان بير سؤز دئمه دي؟»
دئدي :« بير سؤز دئدي يا دئمه دي بيلميرم. اونو بيليرم كي باشيمين اوستوندن قالخاندا هيرص ايله منه باخيب دئدي منيم قيزيم قيرميزي بؤرك دئييل باشدان باشا قويولا. ادالارينا موغايات اول.گئديكدن سونرا دا بير نئچه گون منه اوز وئرمه دي. سورادا آروادلار مني دؤره لييب ، اؤيود وئرديلر كي كيشي دي دا گره ك سؤزونه باخاسان. اونلار بيزه صاحاب ديلار پئمك ايچمه ييميزي وئريلر. بيرده ار آغاجي گول آغاجي اسيرگه مه وور آغاجي. بئله اؤيودلردن سونرا دا بير آيري سؤزلري يوخيدي كي. شهره كؤچندن سونرادا مني ووراردي. قونشولار ايسته رديلر كلانتري يه گئديب شكايت ائله يم. بير دؤنه شكايت ائله ديم. اوزر ايسته دي رضايت وئرديم. آما ائوه قاييدان سونرا همان آش اولدو همان كاسا. آخي ايت ايتليغين ترگيتسه ده سومسونمه غين ترگيتمه ز.
بيزيم ترلان ناهارچاغي كي اولاردي . يئمه يي گتيره نده بوغازيندان گئتمه زدي . مگر خيردا قابلاماسين دولدورونجا. اوشاقلارينين پايين ائوينه آپاراردي.او هميشه اريندن گلئيليق ائله ييب اونا قارقيش ائله ردي. اما هئچ واخت آرواد اولدوغوندان شكايتي يوخيدي.
بير گون اباجيم دئدي :« سن جه كيشي اولسايدين ياخجي اولمازدي؟ هئچ آرزو ائله ييبسن كيشي اولاسان؟»
او باجيمين جوابين مشهدي عباد آهنگيله اوخويوب بئله دئدي:« من ، من ، نه قدير آرواد اولسام دا / ده يه رم مين كيشي يه / بالالاريمي ساتمارام مني قيزيلا / بالالاريم يئمه سه ال وورمارام / من چؤره يه .»
گونلرين بير گونونده كي گئنه پالتار يوماق واختي ايدي . ترلان سئوينه - سئوينه دئدي :« بيليرسيز اريم ارواد آليب. چوخ سئوينيرم. بئكار اولاندا گئدير اونون يانينا.»
آنام تعجب ايله سوروشدو:« به هله نئيه سوويونورسن؟ كيشي نين ائوله نمه يي سويونمه لي دي؟»
خالام سوروشدو:« تازا آروادينا چوخ يئتيشير به جيجيك ائله ميرسن؟»
دئدي :« آي خانيم جان نه جيجيگي؟ قوي جهنم اولسون.هئچ اونو سوويرم كي جيجيك ده ائله يم؟ هله گئچن هفته كي ائوه گلميشدي پار - پالتارين وئرديم قولتوغونا. دئديم داها بو ائوه گلمه. نه واخ دا ايسته دين محضره گئديب بوشاناق. اودا سيرتيق - سيرتيق باشلادي سيزيلداماغي كي مني چوخ سويور.آخي بيري آروادين سؤريسه اوستونه گونو گه تيره ر؟»
ايندي اونون دويغولارين چوخ ياخجي انلاييرام. بيليرسيز كيشي اروادينين جانينين بير تيكه سي دير. آروادين سئوگيلي سي دير. اونون ياخجي - يامان گونونده داياغي دير. سئوير ظولمونو چكير. جيجيك ائلير. آما بو ظولوم حددين اشاندان سونرا ، همين جيجيك كي من بير قديره جاق عاغيللي و گؤزل بير دويغو بيليرم ، آرادان گئدير. رحمتلي قاين آتام دئيه ردي كي واي او گونه كي آرواد ارينه جيجيك ائله مييه . واي او گونه كي آرواد داي ارينه اينانمييا. او گون ار - آروادليغين ائوي ييخيلدي.
ترلانين اري ، اونون ائويندن گئدن دن سونرا ، ترلانين ايشي چوخالدي. ايش او يئره يئتيردي كي ترلاني ائو ايشينه چاغيرماغا قاباقدا واخت آلماق لازيميدي.اونون بير جينقيلي دفتري واريدي قونشولار دفترده ناواخ گلمه سيني يازارديلار. قيزي اوخوياردي.
كارگر گرنونه گؤره ايسته ديم اترلانين و ترلان كيمي كارگر خانيملارين حكايتلرين يازام. آنادان اونون حاققيندا سوروشدوم دئدي :« ترلان ائولرده پالتار يوماغينان اوشاقلاريني گونه چيخارتدي.هر بئش اوشاغينين الي چؤره يه چاتيب داهي انلارين باپنشسته ائله ييبلر.بو ايلده اونو مكه يه گؤنده ره جكلر.»
من ده بو يازيلا ، ترلان و ترلانلارين و بوتون ايشچي لرين كه ديرناقلارينان يئري ائشمه كيلن چاليشيب بالالاريني بير يانا چاتديريبلار. اللريندن اؤپوب و ايشچي لر گونون تبريك دئمه ك ايستيرم.
bölümlər: nağılar