منيم اي نازلي دلداريم ، منيم اي درديمه درمان
منيم اي دولتيم ، واريم ، باغيشلا ، گئچ گناهيمدان
سالاندا سن مني بنده ، ياخينليق اولماسا سنده
اگر قانيمي تؤكسنده ، يولومدان دؤنمرم بير آن
شيريندير لبلرين دلبر ، او گول رخساريني گؤستر
يازيق كؤنلوم سني ايستر ، مني الدن سالير هجران
جمالين پرده يه سالما ، بو عاشيقدن اوزاق قالم
اگؤزومدن انتقام آلما ، مني قويما بئله حيران
بدخشان لعلي سنسن يار ، اوزون ياقوت كيمي پارلار
سنون حسنونده دير گلزار ، جماليندير نگارستان
منيم ايچين ليلي ، عمر انسان ، و يا بلقيس و صنعانسان
يادا بير ماه كنعانسان ، سنه اولسون جانيم قوربان
مني سنه مجنون ائتميش سن ، حياتدا محزون ائتميش سن
اوزونه مفتون ائتميش سن ، ائديبسن قلبيمي بريان
دئييرديم من سنين يارين ؟ كي اولدوم ايندي بيمارين
سنين نوراني رخسارين ، مني يانديردي ، اي جانان
نظامي اولدو بيچاره ، ائديب هجرانين آواره
تاپيلمير دردينه چاره ، اولوب جاري گؤزوندن قان
bölümlər: şerlər